E Schenggung
Ich glaab, aangefang hadd die ganz Sach so Ende Jannuar 1950. Sellemools, wie unser Modder, also, das war mei Großmodder, all ihre Kinner Order geschiggd hadd am nägschde Sunndaach, nummiddaas zur Kaffeezeid, e Mool ellaan bei se se komme fa middenanner se schwäddse. Unn sie sinn all komm.
De Unggel Lui, das war de Äldschd, der hadd de weidschde Wääch gehadd aus de Zischelhidd. Der hadd misse dorch die ganz Schdadd unn hadd vunn unnerwäägs sei äldschd Schwechder, mei Tande Mina mitgebrung. Die hadd unne in de Schdadd am Gäßling gewoohnd. Unn weil se sowieso hann misse beim voorbeigehn, hann se ach grad ihr jingschder Bruder, de Oddoo, mei Padd, middbrung. Der hadd aach uffem Gäßling gewoohnd, awwer ganz owwe.
De Unggel Huuchoo, de Middelschd vunn de Buuwe, hadd nedd weid gehadd. Der hadd weider hinne im Faahrwääch gewoohnd unn war als Erschder doo. Der war immer e Bissje frieer wie die Annere.
Unser Guschdje, mei Good, dem hadd es Haus geheerd, wo ma gewoohnd hann, hadd midd de Modder sesamme zu ääwener Äärd gewoohnd. Jezzd muß ma noch wisse, daß die Modder im unnerschde Schdogg in ihrem Voorbehalld gewoohnd hadd.
Hadd nur noch aans gefääld, es jingschd, es Emmi, mei Mamme, die hadd im Haus Wohnrechd gehadd, unn mir hann im zwadde Schdogg gewohnd. Wie die gemergd hadd das drunne im Hausgang Unruh waar, daß die annerre komm sinn, isse midd mir aach enunner. Sie hadd noch e grooßer Zuggerkuche middgenomm. Die drei woo vunn draus komm sinn hann die Mändel unn die Hied im Hausgang an die Klaaderhooge gehongk. Dann sinn se all middenanner die Kichedier eninn. Ich hann derfe debei sinn. Sunschd war aach nimmand middkomm. Die Modder war emool midd ihre Kinner ellaan. Draus wars bidder kald, es waar noch richdich Winder, unn uff de Schdrooße hadd noch viel Schnee gelääh. Es Guschdje hadd schunn voormiddaas in de guud Schdubb es Eebsche aangemachd damidds guud dorchgewärmd war. Ich hann doodebei derfe helfe unn es Hulz außem Keller beigedraah fa se schiere.
Mir sinn all middenanner eninn. Die Modder hadd schunn drinn am grooße Ausziehdich gehuggd. Am Kobbenn. In ihrem Sessel, mimm Buggel gääe de Oowe. Uff de rechds Seid vunner hadd de Unggel Huuchoo an de Längsseid gehuggd, dord war sei Blazz. Noodeem se sich all begrießd hodde, ma hädd kenne menne sie hädde sich schunn wuchelang nemmee gesien, doobei waare se faschd jeed Wuch aamool beinanner, hann sich die, wo nei komm sinn um de Disch erummgehuggd. Rechds vunn de Modder die Buuwe. Seerschd de Unggel Lui, de Unggel Huuchoo hadd joo schunn gehuggd, nääwedraan de Padd Oddoo.
Linggs vunn de Modder hadd als erschdes die Tande Mina gehuggd, dann ware zwaa Bläzz frei fass Guschdje unn mei Mamme. De Disch waar gedeggd fa Kaffee se dringge unn es Guschdje iss aus de Kich erinn komm midd de groß Kann unn hadd jedem inngeschenggd. Mei Mamme is hinnerhäär komm midd zwaa grooße Dellere wo de Grimmekuche schunn geschnied droffgelää hadd unn hadd se uff de Disch geschdelld. Dann hann sich die zwaa debei gehuggd. Die Modder hadd sich es erschde Schdigg Kuche vunn dem Deller voor sich uff ihr Kuchedellersche geleed unn dann hann aach die Annere zugegriff. Ich hann gääeiwwer vunn de Modder am annere Kobbenn nääwe meiner Mamme gehuggd unn Kuche unn Millich gehadd. Ich hann mich ganz ruuich verhall un mei Kuche gess unn mei Millich gedrungg unn nedd gemuggsd, dass ich nur nedd ufffalle. Sunschd hädde die mich fordgeschiggd, unn ich war doch immer soo gääre debei wann se all beinanner waare. Es meischde vunn dem was die Grooße danne geschwäddsd unn vazeehld hann, hann ich joo nedd vaschdann. Awwer debeisesinn das war fa mich schunn alles. Die Grooße hann sich dann middenanner unnerhall was es so die Wuch iwwer Neies gewwe hadd unn wies ne so geehd, was die Familie machd unn so allerhand.
Biss die Modder dann aangefang hadd se schwäddse, unn doo ware se all schdill unn hann zugeheerd. „Ihr wisse joo, doomools wie eier Vadder so krank war hann ich all es Großvieh vakaafd. Unn noodeem er geschdorb war, hann ich alles was mir uns aangeschaffd hann, unner eich uffgedaald. Er hadd das alles noch zu Lääbzeide so gereecheld wie ers fa richdich gefunn hadd, unn Ihr waare sellemools all demidd innvaschdann unn sefriede. Seiddeem wohn ich doo beim Guschdje in meim Voorbehalld. Es Emmi hadd sich seinerzeid die Gaase angeschaffd. Die zwaa Schdigga Land wo ich noch hann duuds Emmi schunn die ganze Joore bewärrdschaffde unn ich wäär gääre die Laschd loos. Ich hann schunn mimm Emmi unn seim Mann, em Peeder, geschwäddsd unn die zwaa dääde sich das Land gääre aanschaffe. Awwer ich will eich all gefrood hann, daß noohäär kaaner saad ich hädd ne iwwergang. Deswääe hann ich eich heid komme geloßd. Daß mir uns doo driwwer unnerhalle, unn es iss guud daß ner ellaan komm sinn.“
Au, doo hann ich die Ohre geschbizzd. De Babbe unn die Mamme wulle sich Land kaafe. Ich hann mir nie Gedangge gemachd wem das Land geheerd in dem wo mir immer geschaffd hann.In das große Schdigg am Schdennwiller Wald sinn aamool Grommbeere eninngesezzd woor unn es annermool hannse Waaz eninngesääd. Das anner, das klaanere Schdigg owwe unnerm Welschbacher Wääch war midd Klee aangesääd. Dord hammer immer frisches Fuuda gemähd fa die Gaase. Die grooß Wies inn de Lechwies iss zwaa mool im Joohr gemähd woor. Aamool fass Hai unn es annermool fa de Grommed. Zwischedorch Grienfuuder. Jezzd hann ichs gewissd, das Land war de Modder. Dann hadd die Modder se reihum gefrood was se menne, unn es iss jeedes zu Word komm.
De Unggel Lui, dem hadd e Zimmerei midd Schreinerei geheerd, hadd digge Bagge gemachd wie se ne gefrood hadd. „Mich brauchschde nedd se frooe, ich hann midd meim Geschäfd genuuch Aarwedd ich kann nix brauche. Wann es Emmi die Schdigger hann will, kannsche sem vunn mir aus gewwe,“ war deem sei Andword.
De Ungel Huuchoo hadd e rooder Kobb gehadd, wie meischdens wanns um ebbes gang iss, awwer der hadd zur Andword genn: „Midd deem was ich doo gried hann, unn midd deem was mei Fraa vunn ihre Eldere middgried hadd, wie mir geheirad hann, hammer meh wie ma brauche, ich lee kaa Wäärd uff ebbes, gebbs em Emmi wanns es will.“
Dann war die Reih am Oddoo, em jingschde Buub. Der arm Kerl war Rendner, deene hann se schunn frieh misse in Rende duuhn weiler so krank war. Er war aach schunn e paar Mool obberierd unn hadd ne all e bissje laad geduun. Awwer aach der hadd fa sei Daal vazichd unn gesaad:
„Ihr wisse joo daß es Luwwissje, mei Fraa, das Lääwensmiddelgeschäfd hadd. Doodebei hammir uns noch hinnerm Haus am Kerrchobbwääch deene grooße Gaarde kaafd. Doo iss se schaffe genuch, mir känne sunschd aach nix brauche.“ Es Nägschd an de Reih war mei Tande Mina, die wo unne am Gäßlig woohnd. Die war vaheiraad midd Poodches Adolf. Unn der war frieer Schandarm. Die zwaa hann aach im aijene Haus gewoohnd. Das wars Elderehaus vum Unggel. Wie die doomools geheirad hann, hadd er es Haus vunn seine Elldere iwwernomm. Do war noch e großi Scheier midd debei unn e großer Schdall. Die hann aach, wie mir unn de Unggel Huuchoo, noch Gaase gehadd.
Land hann die aach kaans gebrauchd, die hann soo viel gehadd, daß se noch hann kenne vapachde. Deemnoo hadd ach die Tande Mina in der Sach Andword gewwe.
Es Guschdje, mei Good, hadd de Kobb geschiddeld wies an de Reih war. Ääs war geschied vunn seim Mann unn hadd midd seim Bub, em Werner, meim Kussäng, ellaan gelääbd.
„Ihr misse eich doch nedd inbille daß ich mir noch meeh Aarwedd uffhalse als wie ich schunn hann. Ich hann doo middem Haus genuch fa mich unn mei Buub. Unn wann ich emool nemmeeh waas was ich mache sull gehn ich enunner in mei Gaarde, doo hann ich meeh se duun wie genuuch.“
Wärglich, der Gaarde war riesich unn hadd sogar noch fa uns middgelangd.
Wer noo deene doo Geschbrächer am meischde geschdraald hadd war mei Mamme.
Der hadd ma aangesiehn daß se sich gefraid hadd. Die Aussichde waare guud. Jezzd muss joo kaaner menne die Unnerhaldung wär so drogge unn doodernschd voor sich gang. Naa, naa, doo war schunn e luschdiches Välkche beinanner. Do iss so manches Schbäßje zwischedrinn gemachd woor. Die Modder waar aach nedd ohne. Sie hann aach als herzlich gelachd, wann se sich gääeseidich vaäbbeld hann. Jeeder aach iwwer sich selwer, so wie sich das geheerd.
Die Zeid iss e mool wedder viel so schnell eromm gang unn ball wars soweid, daß sich jeder uff de Haamwääch gemachd hadd.
De Unggel Lui unn de Huuchoo hann gemennd es dääd ne noch äbbes fäähle. Ob die Modder odder es Guschdje dann nedd noch ebbes hädde was se kännd e Bissje uffwärme unn voorer Vakällung schizze, woo se bei där Käld jezzd ennaus missde. Es Guschdje hadd in die Runde geguggd wär noch Luschd hadd. Awwer es hadd sich kaaner sunschd gemelld.Do isses in de Modder ihr Schdubb unn haad e Flasch erinnbrung midd zwaa Gläsja. Es hadd de zwaa äldschde Buuwe jedem e Schnäbbsje inngeschenggd. Unn weil ma joo uff aam Baan nedd geehn kann, wies immer gesaad hadd, hadds gleich nommoo noogefilld. Doo hann die Zwaa ihr Wille gehadd, hann sich gefraid unn ausgedrungk. Dann hadd die Modder noch gesaad: „So, jezzd kenne ner dehaam midd eire Leid schwäzze, was die vunn der Sach halle. Unn dann saaner ma die nägschd Wuch Beschaad, dass ich alles erlediche kann“.
Dann hann se sich all vunnenanner vaabschied. Draus wars schunn schdoggdunggel unn die Schdooßelambe waare aan, wie se gang sinn. Mir, wo im Haus blieb sinn, sinn noch middgang bis voor die Dier fa ne nooseguuge. De Unggel Lui unn de Padd Oddoo hann die Tande Mina zwische sich in de Arm gehongk unn sinn de Fahrwääch voorenaus. De Unggel Huuchoo iss in die anner Richdung haamgang. Mei Mamme unn es Guschdje hann noch die Schdubb geliffd, de Dich abgeraumd, es Gescherr gewäschd unn e Bissje Ordnung gemachd. Wie se ferrdich waare hann ich de Modder unn em Guschdje genaachd gesaad unn binn midd meiner Mamme enuff in unser Wohnung wo de Babbe schunn uff uns gewaard hadd.
E guudi Wuch schbääde, s war schunn Februar, hadd die Modder aanes Nummiddaas zu mir gesaad , wann ich Zeid hädd, sull ich mich waarm aanduun, ich missd midder in die Schdadd geehn, sie hädd ebbes se besoorje. Sie hadd immer, wann se außem Haus iss, jimmand misse middnemme, weil se so aarich schlechd gesiien hadd. Voor allem wanns gääe Oomend gang iss hadd se nemmeeh de Wääch gefunn. Sie war joo ach schunn indeem achzich Joor ald.Es war awwer aach immer jimmand doo fa die Modder, wann se aaner gebrauchd hadd. Ich hann se dann aach in de Aarm gehongk. Sie war joo kaum greeser wie ich, unn ma sinn middenanner losgeschaugeld. Ma sinn de alde Kerrschobbwääch enunner, dorch de Paulusegg unn dann an de Poschd langs iwwers Schloßbriggelche Richdung Bahnhof. Awwer an de Bahnhof simmer nedd gang. Gääeiwwer hadd de Noddäär Paquee sei Kanzlei gehadd. Dord simmer hien.
Ich hann im Voorzimmer waarde kenne wie die Modder eninngeruuf woor iss, dord wars scheen warm. Es hadd aach gaar nedd lang gedauerd doo iss die Modder nommoo eraus komm unn saad zu mir: „Komm mei Liewer ich hann alles erleedichd, ma kenne wedder haam gehn“. Do hann ich de Modder in de Mandel gehulf, sie hadd noch ihr Kobbduuch ummgebunn, unn ma sinn middenanner nommoo de selwe Wäch haam wie ma komm sinn. Nur hammer de Berch enuff alsemool misse schdeehn bleiwe weil se so schlechd Lufd gried hadd.
Dann iss aanes Daachs, es war Anfang März, e Brief vumm Noddäär Paquee an mei Elldere komm. Sie möchten in de nägschde Daae, beide zusammen, in de Kanzlei voorschbreche wääe einem Schenkungsvertrag. Doomidd hammer gewissd, die Modder hadd meiner Mamme, unn em Babbe die zwaa Schigger geschenggd.
De annere Nummiddach sinn die zwaa hien, ich hann derfe middgeehn. Die Modder hadd schunn alles voorrichde geloßd, es hadd nix meeh misse vahanneld werre. Es hadd sogar e Kadaschderbladd voorgelää. De Noddäär hadd nur nochemool de Vadraach voorgelääsd, unn gefrood ob mei Eldere so demidd innvaschdann sinn. Die Modder hadd schunn unnerschrieb gehadd, unn jezzd waare mei Mamme unn de Babbe an de Reih. Die Zwaa hann unnerschrieb, dann de Noddär unn der hadd noch e Schdembel droffgedriggd. Doodemidd war die Sach besiecheld. Noch in derselb Wuch hadd de Noddäär midd de Poschd dieSchenggungsurkunde geschiggd, unn noch e „Honorarnote“, awwer das war nur sei Rechnung, der haad joo aach nedd kenne fa nix schaffe. Es hadd noch e Bissje gedauerd noodeem mei Eldere die Gerichdskoschde unn Umschreibgebiehre bezahld hodde, dann iss aanes Daachs vum Amdsgerichd de Grundbuchauszuuch geschiggd woor. Jezzd hann se es Land sogar schwarz uff weiß gehadd.